Candy at Bubble Gum ng Dekada NoBenta: Matamis na Alaala ng Kabataan

Relive your childhood sweet tooth days!

Naging kaugalian ko na noong high school ako na bago pumasok sa eskuwelahan ay dadaan muna ako sa tindahan para bumili ng iba't-ibang kendi. Bukod sa marami kang pagpipilian, iba-iba rin ang lasa ang mga kendi noon, may matamis, maasim at maanghang pero ang lagi kong pinipili ay yung matamis. Maraming dahilan kung bakit nais nating magtunaw ng kendi sa ating bibig habang naglalakad tayo, may gimagawa o kahit sa ating pag-biyahe sa ating mga lugar na patutunguhan.

Nagkekendi tayo sa iba’t ibang dahilan, depende sa sitwasyon at personal na kagustuhan. Una, karaniwan itong ginagawa bilang pampatanggal-umay o pampatanggal ng antok, lalo na kung matamis o may menthol ang kendi. Pangalawa, kendi rin ang madalas na pantawid-gutom kapag walang oras kumain—isang mabilis na solusyon sa gutom o pagkahilo. Bukod dito, marami rin ang nagkekendi bilang anyo ng comfort food; ang matamis na lasa ay nagbibigay ng saya at nostalgia, lalo na kung ito ay kendi na popular noong kabataan. Para naman sa mga bata, kendi ay isang premyo o gantimpala, kadalasang ibinibigay tuwing may okasyon tulad ng birthday o pasko. Sa ilang pagkakataon, ginagamit rin ang kendi para sa pakikisama—isang simpleng bagay na maaaring iabot sa kaibigan o kakilala. Sa kabuuan, ang pag-kekendi ay isang maliit ngunit makabuluhang bahagi ng ating araw-araw na buhay—isang pagsasama ng ginhawa, panlasa, at alaala.

Pero kung may isang bagay na magpapa-ngiti sa lahat ng batang 90s, ito ay ang candy at bubble gum na parang ginto sa bulsa ng mga bata.

Sa panahong ₱1 ay may silbi pa, ang sari-saring kendi at bubble gum ay bahagi ng araw-araw na kaligayahan—kahit isang piraso lang, sapat na para sa instant sugar rush at bonding ng barkada.

Narito ang listahan ng mga paborito nating 90s candy at bubble gum na siguradong magpapabalik ng alaala.

1. BAZOOKA BUBBLE GUM

Lasang-Lasa: Matamis na kinagigiliwan namin ang kulay pink texture na bubble gum!

Highlight: May comic strip sa loob!

Isang piraso lang, solve na. Ang mga kwento ni Bazooka Joe ay parang mini-comic book para sa mga bata. Kahit di mo pa gets yung joke, astig pa rin.

2. YAKEE!

Lasang-Lasa: Maasim na matamis!

Highlight: Sino ang matibay sa asim?

Yakee ang hari ng "tough guy challenge" noon. Lahat ng bata sinusubukan huwag pumikit sa unang tikim. Kapag di ka napangiwi, bida ka sa tropa!

3. SUGUS

Lasang-Lasa: Fruity at chewy, parang sosyal na kendi.

Highlight: May grape, orange, lemon, and strawberry flavors.

Nakabalot individually at parang imported ang dating. Masarap nguyain, at minsan kinakabit pa sa dulo ng lapis!

4. HAW FLAKES

Lasang-Lasa: Lightly sweet, slightly floral.

Highlight: Mukhang communion host, kaya “nag-mi-misa” ang mga bata.

Made in China na kendi na bilog-bilog at manipis. Kapag may haw flakes ka at gusto mong mamigay papilahin mo sila na parang nangongomunyon pero wag, magagalit sa atin ang matatanda hindi dapat jinojoke ang ganung bagay.

5. FLAT TOPS AND CURLY TOPS (by Ricoa)

Lasang-Lasa: Creamy na tsokolate, hindi sobrang tamis.

Highlight: Classic Filipino chocolate.

Kung medyo sosyal ka, Curly Tops. Kung budgeted, Flat Tops. Pero parehong hit sa school recess!

6. TOOTSIE ROLL

   
   

Lasang-Lasa: Chocolate-flavored chewy candy.

Highlight: “How many licks does it take to get to the center?”

Imported vibe, at may “surprise” sa loob—Tootsie Roll! Swak sa mga batang mahilig sa kombinasyon ng matigas at chewy. Ingat lang kami noon kasi baka mabungian ka ng ngipin.

7. LALA MILK CHOCOLATE

Lasang-Lasa: Gatas na tsokolate at sobrang tamis.

Highlight: Murang-mura pero masarap!

Kadalasan sa palengke ito mabibili. Ang pagkain ko dito ay hinahati ko yung squares na design niya bale sa isang pack na Lala meron siya 9 squares na puwede mong kainin.

8. CHOC NUT/HANY

Lasang-Lasa: Peanuty, crumbly, at nostalgic.

Highlight: Minsan favorite ng matatanda, pero love din ng mga bata!

Paborito ng mga titos at titas pero di rin nagpapahuli ang mga kids. Dahan-dahan dapat sa pagkain para hindi gumuho sa kamay. Pagkatapos kainin wag itapon yung parang foil na balat at pwede gawing brace sa ipin. Sino nakagawa nito noon?

9. LIPPS CANDY

Lasang-Lasa: Fruity, parang lipstick ang hitsura.

Highlight: Pinipindot sa gitna ang candy!

Naalala mo ba yung “sosyal” na pakiramdam habang kumakain nito? Parang may sarili kang lipstick. Higit sa lahat pampagwapo ito ng mga lalaki kasi parang nagiging kissable lips sila sa pula ng kanilang labi pagkatapos nila kumain ng Lipps.

10. BUBBLE TAPE

Lasang-Lasa: Matamis at sobrang chewy.

Highlight: “Six feet of fun!”

Masarap, exciting, at pangmayaman vibes. Tapos may friendly competition pa kung sino ang makakakain ng pinaka-mahabang piraso.

Bow Wow Wow - I Want Candy

11. PETER'S BUTTER BALL

Lasang-Lasa: Sweet na buttery caramel.

Highlight: Melts in your mouth.

Kahit maliit, grabe ang flavor. Parang mini-caramel experience!

12. POTCHI (Strawberry Gummy)

Lasang-Lasa: Soft, chewy, strawberry heaven.

Highlight: Hindi lang masarap, cute pa! and it also melts in your mouth.

Kahit hanggang ngayon, may Potchi pa rin, at marami pa ring fans. Bata man o adult.

13. BENSONs

Lasang-Lasa: Chewable kapag tumagal na sa bibig mo

Highlight: Kapag natunaw na may chooey choco sa loob na sobrang sarap na parang state side ang lasa

Nako, kapag bumibili ako nito talagang inililihim ko sa mga abanger na hihingi. Mahal kasi ang Benson candy, dos isa niyan noon.

14. KENDI MINT

Lasang-Lasa: Minty-chocolate inside

Highlight: Sa una parang lasa ng mint at kapag natunaw na sa bibig mo maglalaban na yung mint at chocolate na panlasa

Mas masarap to sa Stork, kapag galing ka sa malansang tanghalian, Kendi mint lang ang katapat pantawid-umay.

15. STORK

Lasa-Lasa: Super Minty

Highlight: Hindi mo kakayanin ang anghang ng stork. Pang hardcore ang minty flavor nito. 

Ang pansin ko lang sa stork ang laging bumibili nito eh yung mga tito, tita at mga lolo. Basta laging matatanda ang bumibili nito basta pagkatapos magyosi ni lolo noon nagpapabili yun ng Stork. 

16. BIG BOY

Lasa-Lasa: Matamis na bubble gum.

Highlight: Famous sa kanyang red and yellow wrapper.

Isa sa dahil ung bakit laging masakit ang panga ng mga batang 90s.

17. FRUTOS

Lasang-Lasa: Maraming fruity flavor. Isa sa mga favourite kong candy.

Highlight: May orange, grapes, strawberries at pineapple

Frutos classic, enjoy sa bibig… Mangunatngunat… Manamisnamis, Mangasimngasim… Frutas ng Bayan!

18. JUICY FRUIT GUM by Wrigleys

Lasang-Lasa: Chewing gum na manamis-namis.

Highlight: Manipis na bubble gum pero matagal maubos ang lasa at pag-nguya dito ka natutong magpalobo ng bubble gum

Super nostalgic sa mga patalastas noon ng Juicy Fruit gum. Yung inalok ng dalawang foreigner ng juicy fruit gum si mamang tsuper dahil exhausted na siya sa traffic sabay hirit ng: "Hey Man, times like this you need a Juicy." Klasik na klasik!

19. CHICLETS BUBBLE GUM

Lasang-Lasa: May have menthol flavor and regular flavor.

Highlight: Mabibili mo ito na nasa manipis na karton.

Isa sa pinakamatandang bubble gum sa Pilipinas. Masarap siya nguyain kasi maririnig mo yung nagka-crack yung base ng kendi niya bago mo marating yung pinaka bubble gum.

20. CARAMEL CANDY

Lasang-lasa: It's already on the name. Isa sa matatamis na kendi noon.

Highlight: Pinakamurang kendi noon. Singko isa sa tindahan kaya ang saya saya ang dahlan kung bakit sumasakit ngipin ng mga batang 90s noon.

Ang problema lang sa kendi na ito ay naninikit siya sa wrapper niya kapag tumagal sa bulsa mo kaya minsan kumakapit yung balat sa kendi.

Special mention: Snowbear, Mentos, Polo, Orange Swits, Nips, Champi, Whistle Polo, Nano Candy, Ring Pops with Kiamoy, White Rabbit, Viva Candy, Nougat, Langka, Haw-haw, Stay Fresh, Tarzan Bubble Gum, Cherry Balls Bubble Gum, Mint Wafer, Sampalok Candy, Cigarette Candy (Smoke Candy), Softee Candy, Nerds, Doublemint, Judge Bubble Gum, Ovalteenies, Rainbow Magic Jelly Ace,, Pintoora, Magic Dust Popping Candy, Push Pop, Almo, Choco-Choco, X.O, Star Fruits, Block Buster Milk Chocolate, Goya Gold Coins, Mik-Mik at Doodoo.

🎵 Most Memorable 90s Candy Jingle

Yung sa Nano Candies, sino ba naman ang makakalimot niyan, lagi kong sinasabayan yan kapag ipinapalatastas sa RPN 9 o kaya IBC 13. Klasik!

Ang Candy Culture Noon

Sa elementary, ang kendi ay parang currency. May trade system pa nga:

1 Flat Tops = 2 Yakee

1 Chocnut = 1 Potchi + 1 Lipps

Marami ring tindera ang may “tingi-tingi” na style—bibili ka ng 1 peso na kendi, at pipili ka sa garapon. Minsan, may libreng papel o sticker pa!

Hindi lang lasa ang bumabalik kapag naaalala natin ang mga kendi noong 90s. Bumabalik din ang panahon ng simpleng kasiyahan—yung isang kendi lang, o mabigyan ka lang ng libreng kendi ng classmate mo ay sapat na pampasaya buong araw.

Kung makakita ka man ng Flat Tops, Chocnut, o Bubble Tape ngayon, subukan mong tikman ulit at namnamin ulit ang nostalgia ng childhood memories mo.